पुरस्कार...

काही दिवसांपूर्वीचा प्रसंग...खुप दिवसांनी जळगाव ला आम्ही मित्रमंडळी एकत्र जमलो होतो .साहजिकच एम जे तील जुन्या आठवणींनी,उपस्थित असलेल्या,नसलेल्या मित्रांच्या – मैत्रिणींच्या धमाल किस्सानी मैफिल चांगलीच सजली होती.त्या मैफिलीत एका मित्राने तो ‘बाप’ झाल्याची गोड बातमी दिली.मुलाचे नाव काय ठेवावे याबाबत त्याने विषय काढला.आमच्या कडून काही नवीन,विशेष अन वैशिष्टपूर्ण नाव मिळेल ही त्याची अपेक्षा होती.अनेक नावे आम्ही त्याला सुचवली,पण हवे असणारे नाव त्याला त्यातून काही गवसले नाही.शेवटी तो मित्रच म्हणाला “नाहीतर ‘भारतरत्न’ हेच नाव ठेवतो.‘भारतरत्न *** ***’.”त्यावर आम्ही खुप हसलो व त्या नावासाठी मित्राला शुभेच्छा देवून आमची मैफिल आटोपती घेतली.... भारतरत्न पुरस्कारबाबत होणारी चर्चा ज्या दिशेने जात आहे त्यावरुन ‘भारतरत्न’ पुरस्काराला आपण गल्लीतील एखाद्या संस्थेद्वारे हेतूपुरस्कर दिल्या जाणार्या पुरस्काराच्या रांगेत बसवतो आहे की काय हि शंका घ्यायला तेथे बराचसा वाव आहे.एखादा पुरस्कार म्हणजेच कार्याला मान्यता या समाजात रुजू होऊ पाहणार्यार सामाजिक प्रवृत्तीतून पुरस्कारांना आम्ही बाजारपेठेत घेवून आलो आहे.त्यामुळे पुरस्काराची प्रतिष्ठा जपण्याचे भानही आम्ही ठेवत नाही. भारतरत्न कुणाला द्यावा हा नेहमीच वाद – विवादाचा विषय राहिलेला आहे.वास्तविक पाहता या महान व्यक्तींचे कार्य एखाद्या पुरस्काराने मोजताच येत नाही.या सर्व व्यक्ती पुरस्कारापलीकडे गेलेल्या असतात.परंतू आमचे राज्यकर्ते राजकारणापलीकडे विचार करताना दिसत नाही,म्हणूनच सरकारची विचारसरणी या व्यक्तींच्या निवडी मध्ये डोकावते हे मात्र उघड सत्य आहे व हे आपल्या देशाचे दुर्दैव म्हणावे लागेल.आपणही अशा सावळ्या चर्चेत त्वेषाने ,चवी ने सहभागी होतो,सज्ज होतो आपल्या आवडत्या तसेच जाती धर्माच्या व्यक्तीला,नेत्याला,महात्म्याला ‘भारतरत्न’ मिळावा ही मांगणी करण्यासाठी....यातून अनेक ‘भारतरत्न’ भारतात निर्माण होतील तुम्हा –आम्हाला प्रेरणा देण्यासाठी..??????